నందనందనుడు నవనీతచోరుడు

 

నందనందనుడు నవనీతచోరుడు

నందనందనుడు నవనీతచోరుడు
నా హృదయమున నివసించు
నా చెలికాడు; మాధవుడు
మహనీయ చరితుడు సిరిదొర
నన్ను కాచును నా దైవము
గోవిందుడు గోప బాలకుడు

రాధా మానసచోరుడు రమణీయ గాత్రుడు
గోవుల కాచెను గోపర్ధనగిరి ధారుడు
భగవద్గీతాచార్యుడు భవబంధ విమోచకుడు
మనసున నిండిన నిండు చందురుడు
చిందించును ఆహ్లాద చంద్రికలు ప్రహ్లాదవరదుడు
జగన్నాటక సూత్రధారి జగములనేలు అందగాడు
నారాయణుడు నిగమనిగమాంత వర్ణితుడు

ప్రజ్ఞానఘనుడు ఆనందస్వరూపుడు మౌని శాంతాకారుడు

లీలా మానుష విగ్రహుడు కాలాతీతుడు
కాలస్వరూపుడు కాముని తండ్రి కాంతా
హృదయ అయస్కాంతము రుక్మిణీపతి
సత్యభామావిధేయుడు గోపవనితా వస్త్రాపహారి

పాండురంగడు శ్రీనివాసుడు శ్రీరంగడు
నృసింహడు విష్ణువు తాపత్రయ నివారకుడు
బదరీ నారాయణుడు భామాకలాపుడు
భావజగురుడు భావాతీతుడు భద్రాచలవాసుడు

కరుణాంతరంగుడు కమనీయ నేత్రుడు
మురళీగానలోలుడు భక్తరక్షణకళా సంరంభకుడు
అర్జునసఖుడు ఆర్తత్రాణపరాయణుడు
అజగురువు శివాభేదుడు శ్రీమన్నారాయణుడు

రసోవైసః ఉపనిషద్వాక్య స్వరూపము సారము
భాగవతకావ్యపు ఊపిరి పోతనార్య ఆరాధ్యుడు
శ్రీనాథుడు శ్రీకృష్ణుడు ఇందిరా హృదయ మందిర
వాసి భక్తహృదయ నిరంతర నివాసి నీలమేఘుడు

నా దైవము నన్ను సతతము కాచు నా రాజు
మనందరి ఏలిక మాధవుడు శుభంకరుడు
ఎల్లప్పుడు స్మరించెదను కరివరదుని
నా నీ వానిని కమనీయుని రసహృదయుని