పదములు - పాదములు; అధ్యయనము - చదువు

పదములు - పాదములు

పదములన్న వట్టి పాదములు కాదు

పదమన్న స్థానము, మాటయనీ అర్థములు

కలవు; పాదమన్న కాలు మాత్రమే కాదు

నాలుగవ వంతుయనీ గ్రహించవలెను
పదము అన్న ఒక నాట్య విశేషమును

గురు పాదములన్న గురు పదములు,

గురు స్థానములు, గురు పలుకులు;

కాళ్ళను అర్థము మాత్రమే తీసికొని

మనిషియైన గురువు కాళ్ళకు మ్రొక్కుట

ఆ పాదముల ఛాయాచిత్రములకు పూజించుట

అంతయు ప్రాథమిక ఆధ్యాత్మికత; ఎదగవలె

మనము; ఒదగవలె మన మనము; శరణాగతి, భక్తి

ప్రపత్తులు చూపుట మన ఏ ఇష్టదైవమునకైననూ

వర్తించును; వైష్ణవ స్వాములు వాక్రుచ్చినట్టు

ఒక్క విష్ణువునకు మాత్రమే కాదు; పరంధాముని

తత్త్వములు, రూపులు అనేకములు; "ఏకమ్ సత్

విప్రాః బహుధా వదంతి". ఇది సత్యము, జ్ఞానము

సత్యమ్ జ్ఞానమ్ అనంతమ్ బ్రహ్మా - ఇది

ఉపనిషత్ సారము; ఉపనిత్ స్రష్టల దర్శనము;

ప్రజ్ఞానమ్ బ్రహ్మా, రసోవైసః, ఆవందో బ్రహ్మా -

అనునవి పరమాత్మ పరమ పదములు;

పరమ పద సోపానములు; బ్రహ్మ కడిగిన

పాదము పరబ్రహ్మ పదము; గణనాథుడు

షణ్ముఖుడు, ప్రమథ గణములు సతతము మ్రొక్కు

పరమశివుని దివ్యపదములు; ఉపనిత్ పదములు

పదములు నామస్మరణమునకు;

పాదములు పూజకు; పదములు

పొందుటకు; పదవిన్యాసము చేయు

ఆనందతాండవ ‌హేల పరమ స్త్రీ, పురుష

ధింధిమి నర్తనము; శ్రుతిలయల

సంగీత మధుర సమ్మేళనము;

మురళీరవళి వినిపించు మాధవ సరళి

లక్ష్మీనారాయణుల, వాణీబ్రహ్మల సంగతి

వాదతనుమనిశుడు శివుడు

ఓంకార రూపుడు జగన్నాథుడు

జ్ఞాన స్వర శక్తుల మూలము, వ్యాపారమయము

సమస్త జగతీ సృష్టి స్థితి ప్రళయము

 అధ్యయనము - చదువు

రచనలు చేసేవారు, కవిత్వం అల్లేవారూ మంచి గమనిక కలిగి ఉండాలి. తమ లోపల, బయట జరుగుతున్న వాటిని పరిశీలించి విశ్లేషించి తమ సాహితీసృష్టికి వినియోగించుకోవాలి.

వీటితో పాటు పుస్తకాలు, రకరకాల విషయములపై రాసినవి, చదవాలి. ఈ చదవడం, రైతు భూమిని‌ చదును చేసి, దున్ని, తడిపెట్టడం వంటిది. అప్పుడు ‌విత్తిన విత్తు అంకురమై, మొక్కగా ఎదుగుతుంది, రవికిరణముల‌ సాయంతో. ఇలా చదవడమే, జ్ఞానాన్ని, పాండిత్యాన్ని పెంపొందించు కొనడమే సాహితీ విత్తనములకు రవికిరణములు అవుతాయి. నిరంతర అధ్యయనము సాహితీ సృష్టిని సుసంపన్నం చేస్తుంది. 

స్పందించే హృదయంతో పాటు జ్ఞాన సముపార్జనము ఉంటే మంచి సాహిత్యం వెలువరించ వచ్చు.
చదువు సమస్తమునకు ఆధారము. ఆలంబనము కూడా.