ఉపనిషత్ ధ్యాన పద్ధతులు - బ్రహ్మ విద్యలు
శ్రీ వాశిష్ట గణపతి ముని - రమణమహర్షుల గురుత్వం
నా ఏకలవ్య శిష్యరికం
రమణుల మాటలు
ఇక్కడ రమణులు అంటే రమణి పదమునకు బహువచనము కాదు. శ్రీ రమణ మహర్షి అని.
మన మాట భావమునకు, తలపునకు, ఆలోచనకు ప్రతిఫలనము. ఫలము. భావములు, తలపులు, ఆలోచనలు, మానసిక దృష్టులు; అనుభవమునకు, అర్థమవడానికి, అవగాహనకు, ఆకళింపుకు, ఆలోకనకు, ఆస్వాదనకు, ప్రతిఫలనము. ఫలము. అనుభవము, అవగాహన, ఆకళింపు, ఆలోకన, ఆస్వాదన, అర్థమవడం ఇవన్నీ శ్రద్ధకు, ప్రతిభావ్యుత్పన్నతలకు, జిజ్ఞాసకు, జ్ఞానార్జనకు, జ్ఞాన సముపార్జనకు తెలివితేటలకు ఫలములు.
నేను యానాంలో ఫిజిక్స్ అధ్యాపకునిగా పని చేస్తున్నప్పుడు, సహ రసాయనశాస్త్రాధ్యాపకులు, నా సహ చరులు అయిన రామాయణం సత్యనారాయణ గారు శ్రీ కొండూరి వీరరాఘవాచార్యులవారు (అప్పటికి వారు సన్యసించారు) రచించిన "ఆత్మజ్ఞానము" అనే పుస్తకం చదవడానికి ఇచ్చారు. అప్పటికి నాకు మనందరం భగవద్గీత ద్వారా విన్న, ప్రచారంలో ఉన్న ఆత్మను గురించిన రెండు మూడు మాటలు తప్ప మరేమీ తెలియవు.
ఇది వరకు అప్పటికి మనలో ఆత్మ ఉంటుందని,శరీరం మరణించినపుడు ఈ ఆత్మ మరణించిన శరీరంనుంచి, పునర్జన్మ ఎత్తబోయే కొత్త శరీరంలోకి పరకాయ ప్రవేశం చేస్తుందని విన్నాను. కాని పునర్జన్మల మీదా, ఆత్మ పరకాయ ప్రవేశం మీదా నాకు చిన్నప్పటి నుంచి స్ఫురణ రూపంగా నమ్మకం లేదు.
అందుకని ఈ ఆత్మజ్ఞానము పుస్తకము చదువుతూ ఉన్నప్పుడు ఆత్మ విషయంపై కొన్ని కొత్త స్ఫురణలు కలిగాయి. ఆత్మ గురించి మాట్లాడుతూ ఉపయోగించ బడిన "జ్ఞ", అక్షరం అనండి, పదము అనండి, ఆత్మ మనలో ఉండి మనకు జ్ఞానము కలగడానికి తోడ్పడుతుంది, తోడ్పడుతోంది అనే స్ఫురణ కలిగింది.
ఈ స్ఫురణ కలిగినప్పుడు నాలో ఎంతో ఆనందం వెల్లివిరిసింది. ఈ స్ఫురణ ఆత్మ పట్ల నా దృష్టిని, దృక్పథాన్ని మార్చేసింది. మనకు అన్నీ తెలిసేలా చేసే శక్తి స్వరూపము ఆత్మ అనిపించింది. ఈ అవగాహన నా మనసుని వికసింపజేసి నన్ను ఎంతో ఉత్సాహపరచింది.
అప్పుడు అలా ఆత్మజ్ఞానము పుస్తకము చదివాను. నాకున్న విజ్ఞాన శాస్త్రావగాహనతో ఆత్మ స్వరూప స్వభావాలపై ఒక ఆకళింపు కలిగింది. ఆత్మను ఆ దృష్టితోనే పరిశీలించడం ప్రారంభించచాను.
అదే సమయంలో నేను మనసంటే ఏమిటి, మనసు వల్ల మనకింత అలజడి, బాధ, ఆవేదన, ఎందుకు కలుగుతున్నాయి తెలుసుకోవాలనే ఉత్సుకతతో మనసు, బుద్ధి ఉండేవి. ఆత్రేయ గారి మనసుపై పాటలన్నీ లోతుగా అధ్యయనం చేయడం మొదలు పెట్టాను. అదే సమయంలో జగ్గయ్య గారు ఆత్రేయ గారి సినిమా పాటల సంపుటం ప్రచురించారు. ఈ పుస్తకము మనసుపై లౌకికమైన అవగాహన కలిగించింది.
అప్పటికి నేను భగవద్గీత ఒక సారి పూర్తిగా చదివి ఒక అవగాహన ఏర్పరచుకున్నాను. మనసు మనిషియైన మనమనీ, బుద్ధి పరమాత్ముడైన భగవంతుడు శ్రీకృష్ణుడనీ అనిపించింది.
ఇన్ని భావములతో, ఆలోచనలతో, కించిత్ కృష్ణ పరమాత్మతో సాగించిన మానసిక సంభాషణ నా హృదయాన్ని దున్ని ఉంచాయి.
అదే సమయంలో నా స్నేహితుడు గురుప్రసాద్ తోడల్లుడైన శ్రీ గుంటూరి రామకృష్ణ గారు వారి పినతండ్రి శ్రీ గుంటూరి లక్ష్మీకాంతం గారు రచించిన శ్రీ వాశిష్ట గణపతి ముని గారి ఆత్మకథ "నాయన" ఇచ్చి చదవమన్నారు. ఆ పుస్తకము నన్ను అప్రతిభుడిని చేసింది. గణపతిముని వ్యక్తిత్వం నన్ను ఎంతో ప్రభావితుణ్ణి చేసింది.
ఆ పుస్తకం లోనే గణపతి ముని తపస్సు, బాల్యం లోనే ఆయన కవితా వ్యాసంగము, జ్యోతిషశాస్త్రం పై పట్టు, పాండిత్యం నన్ను ఎంతో ఆకట్టుకున్నాయి. ఆయన నవద్వీప విజయం, కావ్యకంఠ బిరుదు ప్రదానం ఎంతో ముచ్చటగొలిపాయి. ఆయన మంత్రోపాసన, మంత్రశాస్త్ర ప్రావీణ్యం, మద్రాసులో అవధాన, ఆశుకవితా నిపుణతలు, శిష్య పరంపర, శిష్యగణము గురించి చదువుతూంటే మైమరచిపోయాను. ఆయన అభిమానినై పోయాను.
అంతటి మంత్రశాస్త్రవేత్త, తపస్వి, కవి, అవధాని, వేద పండితుడు, సంస్కృత, తెలుగు భాషలలో దిట్ట, సాహితీ
స్రష్ట, తెలుగు అధ్యాపకుడు బేలయై అరుణాచలం పై ఉన్న బ్రాహ్మణ స్వామి పాదములు పట్టుకొని తపస్సు నిర్వచనం అడిగినప్పుడు రమణ మహర్షి నాకు పరిచయమయ్యారు.
అప్పటికి రమణ మహర్షి, రమణాశ్రమం పేర్లు, అరుణాచలం, చలం గారు ఆ ఆశ్రమపరిసరాలలో నివాసం ఏర్పరచుకోవడం గురించి చదవడం తప్ప మరేమీ రమణ మహర్షి గురించి తెలియదు. నన్ను ఆకర్షించిన, ఆకట్టుకున్న గణపతి ముని రమణులని గురువుగా స్వీకరించడం నాలో రమణ మహర్షి గురించి తెలుసుకోవాలనే జిజ్ఞాసను కలిగించింది.
అదే సమయంలో నేను రమణ మహర్షి భాషణములు అనే ఆశ్రమం ప్రచురణను చూచాను. చేప నీటిలో ఈదుతూ జీవించినట్టు నేను ఆ పుస్తక పఠనంలో ఈదుతూ గడిపాను. మొదట్లో నాకేమీ అర్థం కాలేదు. అయినా చదివేశాను. అలా నాలుగైదు సార్లు చదివేశాను. కొద్ది కొద్దిగా అవగాహన కలగడం ప్రారంభించింది.
ఆ విధంగా నేను గణపతి మునికి, రమణ మహర్షికి ఏకలవ్య శిష్యుడిని. వారిద్దరూ నాకు ఆధ్యాత్మిక గురువులు. చిన్నప్పటి నుంచి మా అమ్మగారు, నాన్నగారు కలిగించిన ఆధ్యాత్మిక అంకురం చిలవలు, పలవలు వేయడానికి గణపతి ముని, రమణులు, వారి వ్యక్తిత్వాలు, అనుభవ పూర్వక మాటలు ఎంతో తోడ్పడ్డాయి. అందుకని గణపతి మున,ి రమణులు అంటే నాకు గౌరవం, గురుభావం. భగవద్గీత గురించి వినడంతో మాత్రమే పూర్తి
అయ్యి, నా సమస్త ఆధ్యాత్మిక జ్ఞానము అయిన స్థితి నుంచి ఆత్మజ్ఞానము, బ్రహ్మముల పైన వ్యాసములు వ్రాసే స్థితికి రాగలగడానికి ఎంతో ఉపయోగపడినవి గణపతిముని, రమణుల మాటలు. నేను మా తల్లిదండ్రులకు, వాశిష్ట గణపతి ముని, రమణ మహర్షులకు నాకు కలిగిన ఆధ్యాత్మిక అవగాహన ఆకళింపు లకు ఎంతో ఋణపడి ఉన్నాను.
గణపతి ముని వ్రాసిన విశ్వ మీమాంస, రమణుల సంభాషణమంలు, నేను ఎవడును? (తమిళంలో నాన్ యార్?), ఉపదేశసారము, సూరి నాగమ్మ గారు రచించిన శ్రీరమణాశ్రమ లేఖలు నా ఆత్మ, బ్రహ్మ జ్ఞానముల లోతులు పరిశీలించే ఆకళింపు కలగడానికి ఎంతో తోడ్పడ్డాయి.
వీరందరికీ, వారి సంభాషణలు, మాటలు, లేఖలకి నేను ఎంతో కృతజ్ఞుడిని.
ఉపనిషత్తులలో పది ధ్యాన పద్ధతులున్నాయి. వీటిని బ్రహ్మ విద్యలు అంటారు.
శంకరులు భూమ విద్యా ఉపదేశకులు.
రామానుజులు శాండిల్య విద్యా ఉపదేశకులు.
రమణులు దహరా విద్యా ఉపదేశకులు.
ప్రాణోథ్గీత విద్య, అక్షరోథ్గీత విద్య, భృగు విద్య, జ్యోతిర్ విద్య, సంవర్గ విద్య, ఉపకోసల విద్య, వైశ్వానర విద్య ఇతర విద్యలు.
ఈ విద్యలన్నీ క్రమానుగతంగా చర్చించబడతాయి.
No comments:
Post a Comment