ప్రకృతి రామణీయకము - మనసు గానము, నర్తనము - పరమాత్మానుభవము

ప్రకృతి రామణీయకము - మనసు గానము, నర్తనము - పరమాత్మానుభవము


ఎదురుగా లోయలో వయ్యారములు చిందించుచున్న
కృష్ణవేణీ జన్మస్థాన సౌందర్యములు, సరసీ తారుణ్యములు
నింపినవి మనసున ఆనందము, మౌనము, శాంతము
అల్లరి పిల్ల మనసు ప్రౌఢయై తనివిచెంది పొందినది బ్రహ్మానుభవము

కొండలు, లోయలు, కృష్ణను, కనుచున్న నాకు చలివేయని చల్లనిగాలి
సోకుచు మనమును ఊయలలూపినది ఆ రామణీయకము; హత్తుకన్నది
హృదయమున; డెందము చేసినది ఆనందపు నర్తనము; పరమాత్మయే
దర్శనమొసగి దగ్గరకు తీసికొన్న అనుభూతి మనసున నిండి, ధన్యత
కలిగి మైమరచితిని; ప్రకృతి భగవత్ స్వరూపము, రమణీయ కావ్యము,
శాంతి సంతోషములనిచ్చు భగవతీ అనుకంపన, అనురాగము

గానము చేసినది మనసు ఆ దృశ్యముల "శ్రావ్యతను"
విరామమునంది అనుభవింపజేసినది రామ తత్త్వమును

స్నానమాచరించితిని కృష్ణానదీ సుందరదృశ్య సలిలములందు
ప్రేయసీ వంటి ప్రకృతిలో లీనమై పరవశించితిని నిర్వాణమునందితిని