జగన్నాథుని రాసలీలలు

జగన్నాథుని రాసలీలలు

మా పెరటిలోనున్న అరటిపిలక వేసె మారాకు
ఆహ్లాదమందె నామది; ఊగె పైరగాలికి అయ్యి చిగురుటాకు

సరసమై స్పందనగల హృదయము
ప్రకృతినానందించును హృద్యంగా

మొక్కల పచ్చదనము; నీటిజాలుల
జరజరల జలజలలు; నీలిసంద్రపు
అందములు అల్లన ఆ దూరముల
ఆకసమునంటును; కలియు నింగిని
అందమున శ్యామల వర్ణమున
అనంత వైశాల్యమున గాంభీర్యమున
గరుడధ్వజుని మేని చాయ ప్రకాశమై

రమణుల రంజనములు; వినువీధిని
అందాల తారకలు వాటి విభుడు చల్లనిరాజు
సమముగ నిత్తురు హాయిని; ముదమును;
యువతీ శృంగార రూపములె యౌవ్వన నిధులే

అంతయు ప్రకృతీ విలాసములు
రమణీయ కలాపములు; రసహృదయ
రంజనములు; సుమధుర శ్రావ్య స్వనములు
రాగ రంజిత మానస ఆనంద హేలలు; నర్తనలు

ప్రకృతిని నిండి ఉన్నవి ప్రశాంతత నిచ్చు
స్థిమితము కలిగంచు దృశ్యములు ధ్వనులు;
స్పందించి మురియగల మనసుకు నిత్య
విందులు; షడ్రసోపేత భోజనములు; తృప్తినిచ్చు

రసమయ ఉనికిలు; జగన్నాథుని రాసలీలలు
కనులు చెవులున్న మనసే బృందావనం
మానినీహృదయచోరుని రసనిలయం
రమ్య సన్నివేశ భరిత జగతీ రామణీయకతలు