నల్లనయ్యతో నేను

నల్లనయ్యతో నేనునడచితి నా  ఉదయమున కలతచెందిన మనసుతో 
బరువెక్కిన హృదయముతో 
అందమైన ఆ తోట యందు
తరులు ఫలములు లతలు విరులు 
వర్షించెను ఆత్మీయత వృక్ష సంతతి 
పలికెను స్వాగతము పచ్చని మనసుతో 
హాయి కలిగె; మదిని నిండే సంతోషము 

వికసించిన పూబాలల పలుకరించితి 
ప్రకృతి చందమంతయు పరికించితి
వచ్చినదప్పుడే వసంతకాలము 
మామిడి చిగురులు తిని కోయిలలు 
ఆలాపించుచుండె ప్రణవ నాదము
అల్లన మామిడి గుబురుల నిలిచి 

కలకాలము చేసె పక్షికులములు 
వీవన వీచి మంద మారుతము
పన్నీటి జల్లు హృదిపై చల్లుచుండ
ప్రభవించె తూరుపు దెస ప్రభాకరుడు 

ఎద ఎగయ చూచుచుండ ఇన్ని
అందములు; ఇంతలో ఎదురుగ 
చూత వృక్ష చ్ఛాయని  తిన్నెపైన
అవతరించె వెన్ను ఝల్లన 


 


కస్తూరీ తిలకమును నొసట దిద్దుకుని 
పీతాంబరము అందముగా కట్టుకుని
మందారమాల కంఠమున శోభించగ
మౌళి  పై నెమలి పింఛము కదలాడగ

మోవిని తాకి లేత వెదుళ్ళు మనోహరముగ
భూపాల రాగమాలాపించుచుండ 
అగుపించే నల్లని  స్వామి; నిను నను 
అందరిని కాచేటి కరుణా సముద్రుడు 

సిరి దొర కనుపించె కన్నుల నిండుగ
నవ్వు రాజిల్లు మోముతో నాకు 

ఉద్వేగము ఉత్కంఠ ఆనందము నను
ముప్పిరిగొని తొందర పెట్టుచుంద 
పరుగెత్తితి రివ్వున బాణము వోలె 
చేరితి శ్రీహరి సన్నిధి; వాలి పోతి
కన్నయ్య పాదాబ్జముల పూవు వోలె 
స్పృశించితి పద్మాక్షు పాదములు మృదువుగా 

తల ఎత్తి చూచితి ముకుందుని వైపు 
ఆర్ద్రములైనవి కన్నులు; జల జల రాలె
బాష్ప కణములు; కడిగితి స్వామి
పాదములను ఆనాదాశ్రుధారలతో

ఉద్వేగమడగినది; ఉత్సాహము పెల్లుబికినది 

భక్తి నిండిన కంటి చూపులు పత్రములుగ; అను
రక్తిని కరముల జోడింపు తీయని ఫలముగ
శక్తి మేర నారాయణ నామ స్మరణము తోయముగ స 
ద్భక్తి మయమైన హృదయము పుష్పముగ 

అర్పించి అర్చించితిని అచ్యుతుని 
నేర్పుగ ఉల్లాసము కలిగించు కం
దర్ప జనకుని నీలమేఘ శ్యాముని దుష్ట 
దర్ప వినాశకుని శ్రీ రమణీ మనోనాయకున్ 

ఓడలు నిమిరె కన్నుల తడి తుడిచి వైచె 
అనునయించె స్వామి ప్రేయసి వోలె 
చేరదీసి బుజ్జగించె అమ్మ వోలె 
ఆనందము నిండ ఒదిగితిని ఒకింత 

స్వామి ఒడిని పసిబిడ్డడి వలె 
శ్రీమన్నారాయణ కర స్పర్శమున 
పులకిత గాత్రుడనై పొందితి 
దివ్య ఆనందానుభూతి దేముని చెంతన్ 

పలుకులు పలికించి అక్షరముల దిద్దించి శబ్దార్ధమయమైన భా 
షల నేర్పించి కావ్యముల వెలయింపచేసి అందములు నింపి విం 
దులు సేయు నిన్ను ఏ పదక్రమమున నుతింపను శౌరీ!
శ్రీలక్ష్మీరమణా! రంజిల్ల హృదయము సంతసము కలుగ నీకున్!

రాగములు సృజియించి శ్రావ్య నాదముల 
ప్రకృతిని పులకింప చేయు మురళీగానలోలా!
ఏ రాగమున ఆలాపింపను నీ నామమును 
అనురాగమున దక్క  నా మానస వీణ పై 

తపములు సేయలేదు జపముల ధ్యాస లేదు
మంత్రతంత్రములు ముందే తెలియవు 
సతతము నీ నామ స్మరణము చేయమని 
బుద్ధి అనుచున్నను బద్ధకించు నేను

చేయదగు చేయదగని కృత్యముల 
విచక్షణా రాహిత్యమున వైకల్యము
నొందిన మనమున నిను నిల్పలేకున్నాను 
కావుమయ్య కృష్ణ! కరిరాజ వరద!

జీవితమున ఎత్తులు పల్లములు 
ఎక్కి దిగి  ఎదురు దెబ్బలు తిని 
శక్తి క్షీణించి మనసుకు లొంగి 
మానస వర సంచారము నిలిపి 

నీ మూర్తిని పొడగన లేకున్నాను 
ముకుందా! నిర్వహించ వలసిన 
ఒకటి రెండు బాధ్యతలు స్వీకరించి 
ఆపై మనసు చెయ్ అల్లరికి అలసి 

అవకతవకగ  వర్తించు నన్ను 
అర్జునుని వలె ఉద్భవుని వలె 
చేరదీసి బ్రోవుము శ్రీకృష్ణా!
చీకులు చింతలు బాపుము శ్రీధరా!

కరుణను నాకు మరియొక మారు
భక్తి జ్ఞాన కర్మ మార్గములను 
మనసుకు హత్తుకొనునట్లు
మధురముగ ఉపదేశించు మధుసూదనా!

మా తుళ్ళూరు యాత్ర (వ్యాసము)

మా తుళ్ళూరు యాత్ర

తుళ్ళూరు ఊరు గురించి తెలుగు వారికి, అదే ఆంధ్రులకి, ప్రత్యేకముగా చెప్పనవసరము లేదు. వార్తాపత్రికల్లో, టివీల్లో ఆ పేరు ఊదరగొట్టేస్తున్నారు. అంచేత తుళ్ళూరు అందరూ విన్న ఊరే. ఎక్కడ ఉందో ఎక్కువ మందికి తెలియకపోవచ్చు. ఇంతటి పేరు మోసిన తుళ్ళూరు ఊరుని సందర్శించడానికి మేము - నేను, మా ఆవిడా – పాండిచేరి నుంచి బయలుదేరలేదు.

ఈ మధ్య అన్ని రాజకీయ పార్టీలు కూడబలుక్కొని చీల్చిన ఆంధ్రరాష్ట్రపు ముక్క రాజధానీ నగరం తుళ్ళూరు చుట్టుపక్కల నిర్మించడానికి ముఖ్యమంత్రి పెద్ద ప్రయత్నం చేస్తూ, తను వింతగా హడావుడి పడుతూ, అందర్నీ హడావుడి పెడుతున్నాడని మాత్రం పాండిచేరి నుంచి బయలుదేరే ముందు చదివాను.

నవంబరు చివరివారంలో ఒక ISKCON అంతర్జాతీయ సదస్సులో “ఉపనిషత్తులు- జ్ఞానబోధా మీమాంసా దృక్పథము” విషయముపై నా పరిశోధనా పత్రాన్ని సమర్పించడానికి విజయవాడ చేరుకున్నాము. నిర్వాహకులు ఒక హొటల్ లో మా బస ఏర్పాటు చేశారు. మరునాడు సదస్సు ప్రారంభం అవుతుంది. ఒక రోజు ముందుగా వచ్చేశాము. అంచేత ముందురోజు ఖాళీ. సత్యం శంకరమంచి గారి అమరావతి కథలు చదివినప్పటినుంచీ నాకు సత్యంగారితోటి, అమరావతితోటి అవినాభావ సంబంధం ఏర్పడింది. అమరావతి అన్నా, సత్యంగారి అమరావతి కథలన్నా ఎంతో మక్కువ. అమరావతి చూడాలనీ, అక్కడి కృష్ణానది సోయగాలు చూడాలనీ, అమరేశ్వరుణ్ణీ, బాల చాముండేశ్వరీ దేవిని దర్శించుకోవాలనీ ఉత్సుకత, అభీష్టమూను.

ఇంతవరకు వీలు కాలేదు. ఎన్నోసార్లు విజయవాడ వెళ్ళడం అక్కడ స్నేహితులతో రెండు మూడు ఉండి గడపడం, అమరావతి వెళ్ళాలనుకుంటూ వెళ్ళలేకపోవడం ఎన్నోసార్లు జరిగింది. అలాగే గుంటూరు అంతర్జాతీయ కవుల సమ్మేళనానికి నాలుగైదు సార్లు వెళ్ళినప్పుడూ కుదరలేదు.
శివాజ్ఞ లేనిదే చీమైనా కుట్టదు కదా. శివాజ్ఞ అయినట్టుంది, ఈ సారి తప్పక దర్శించుకోవాలనే దృఢ నిశ్చయంతో పుణ్యము, పురుషార్ధము కలిసొచ్చేలా చేసుకందామనీ ఒక రోజు ముందరగా విజయవాడ చేరాము. అంచేత అమరావతి వెళ్ళడానికీ, దారిలో ఉండవల్లి గుహలు, మంగళగిరీ కలుపుకొని రానూ, పోనూ అమరారామానికి (అమరావతికి) టాక్సీ మాట్లాడుకొని ఉదయమే బయలుదేరాము.

(అమరావతిలోని అమరారామము, మా ఊరే అయిన భీమవరంలో సోమారామము, మా పక్కనే ఉన్న ఊరు పాలకొల్లులో క్షీరారామము, మా పక్క జిల్లా తూర్పు గోదావరిలో దాక్షారామంలో దాక్షారామము, కాకినాడ పక్కన సామర్లకోటలో కుమారారామము అని పంచారామ క్షేత్రములు ఉన్నాయి. ఈ ఐదు క్షేత్రములను తప్పక సందర్శించాలని చాలామంది ఆంధ్రులు అనుకుంటారు.)

ఉండవల్లి గుహలు, గుహలనుంచి క్రింది ప్రకృతి సౌందర్యము చూసి ఆనందించి మంగళగిరి వెళ్ళాము. లక్ష్మీ నరసింహస్వామిని, రాజ్యలక్ష్మీ దేవిని దర్శించుకొని, పానకము తాగి అమరావతికి బయలుదేరాము. మంగళగిరి క్రింద నరసింహస్వామిని దేవేరితో దర్శించుకొని అమరావతి రోడ్డెక్కాము. పచ్చని పంట పొలాల మధ్య కారు వెడుతూంటే ఆ ప్రకృతి సౌందర్యాన్ని ఆస్వాదిస్తూ ప్రయాణిస్తున్నాను.

బంగరు వరిచేలు, ధాన్యాన్ని వహించి మన అన్నదాతలై విరాజిల్లుతున్నాయి. నేను పశ్చిమగోదావరి జిల్లా భీమవరం వాడిని కాబట్టి నాకు పంటకాలవలు, వరిచేలు నెచ్చెలులు. ఆ ప్రకృతి సౌందర్య వీక్షణంలో ఎంతో ఆనందం కలిగింది

*తరుణ రమణుల వరుసల సోయగములు చిందిస్తూ అరటి తోటలూ; గులాబులను, పువ్వులను కలిగిన పూలతోటలూ; ఇతర ప్రకృతి దృశ్యాలు;

*ఏరులు, లోతైన చెరువులు;

*వాటిలో నిర్మలమైన నీళ్ళు;

*పరిణితి చెందిన హృదయముల పోలు పసుపు చేలు; భక్తిపరులు పక్వ మనమును పోలిన పసుపుదనాలు;

*పెద్దల మనముల వలె ఉన్నతములైన నారికేళ వృక్షములు;

*మన బచ్చలి కూరకు అమితమైన రుచినిచ్చే కంద తోటలు;

*అందమైన యువతుల అధర సుధారసమును వహించిన చెరకుల తోటలు;

*వయసు వచ్చీరాని కన్నెల వలె పూచీ పూయని మామిడి చెట్లు;

*ఎన్నో రకముల కూరగాయ తోటలు

పచ్చదనం రూపుగొని శ్యామలా దేవి ఆనంద తాండవము చేస్తోంది

ఇవన్నీ చూస్తూ నేను ఒక దివ్య రసలోకంలో విహరిస్తున్నాను.

ఇలా ప్రకృతి అంతా కనువిందు చేస్తున్న వేళ కారు అన్ని పల్లెటూళ్ళను దాటి ఒక ఊరి మీదుగా వెళుతోంది. అక్కడ డ్రైవరు కారు నెమ్మదిగా నడపాల్సి వచ్చింది. ఇంతలో నేను ఇహ లోకంలోనికి వచ్చాను. అక్కడ తీర్థ ప్రజ. ఇక్కడ ఇవాళ ఏమయినా తీర్థమా అని డ్రైవరును అడిగాను.

“తీర్థమేంటండీ బాబు. అది సబ్-రిజిస్ట్రారు ఆఫీసు. ఈళ్ళందరూ పొలాల రిజిస్ట్రేషన్ కి వచ్చిన రైతులు, దళారులూ నండీ. సిబిఎన్ పుణ్యమా అని ఇష్టం ఉన్నా లేకున్నా ఈ రైతులందరూ యవసాయం గంగలో కలుపుకుని ఎకరం కోటి, కోటిన్నరకి అమ్మేస్తున్నారండి.

అప్పుడు స్పృహలోకి వచ్చి నేను “ఇది తుళ్ళూరా” అన్నాను.

“మంగళగిరి కింద గవర్నమెంటు స్థలాలే, ఎన్ని ఎకరాలు కావలిస్తే అన్ని ఎకరాలున్నాయండి. కృష్ణా నది ఒడ్డమ్మట కిందకి అన్నీ పోరంబోకు బంజరు బూమండి. ఈడికి ఈ పంటచేల మీద ఎందుకు పడిందోనండి కన్ను. పార్టీ పెద్దోళ్ళకి సానా మందికి ఇక్కడ బూములున్నాయండి. దానికోసవండి ఈ ఏడుపంతా. పంటలు పండే సారవంతమైన బూములన్నీ ధొంసం సేసేస్తన్నాడండి.”

ప్రతి గ్రామం లోనూ రియల్ ఎస్టేటు వ్యాపారం బోర్డులు కనిపించాయి. నాకూ మనసు ఒక సారి ఖేద పడింది; ఇంతటి అందమూ, పచ్చదనమూ ఒకటి రెండేళ్ళల్లో మాయమైపోతాయనుకునే సరికి. రోబోట్ లు కాకుండా ప్రకృతి సౌందర్య పిపాసులు రాజకీయాల్లో ఉంటే బాగుండును కదా అని ఎంతో అనిపించింది. ఎన్నిక అయ్యే వరకు ఒక ఎజండా. ఎన్నికయ్యాక స్వంత ఎజండా. రాజకీయనాయకులు దేనినుంచైనా లబ్ధి పొందగల చాణక్యులు.

నెమ్మదిగా అమరావతి చేరాము. పంచారామ క్షేత్రమైన అమరారామంలో కృష్ణమ్మ సొగసులు, నది ఒడ్డున అందగించిన బాల చాముండీ సమేత అమరేశ్వరుణ్ణి దర్శించుకొని, సత్యం శంకరమంచి గారికి మనసా ప్రణమిల్లి, ఆయన కథలలో ప్రతిఫలించిన అమరావతిని, కృష్ణవేణిని తనివిదీరా చూసుకొని, కనకదుర్గమ్మ దర్శనానికి విజయవాడ వెళ్ళాము. అక్కడ తల్లి దర్శనంతో మనసు నెమ్మదిని చెంది తల్లి కరుణతో కనక దుర్గమ్మపై ఒక కవితని వెలయించింది. నేను కృతార్ధుణ్ణి అయ్యాను. ఆ సంస్కృత కవిత క్రింద ఇస్తున్నాను.

శ్రీ కనకదుర్గా స్తవమ్ డా. వారణాసి రామబ్రహ్మం

ఆత్మనా దర్శయామి మనసా భజామి
బుద్ధ్యా జానామి చిత్తేన స్మరామి
ఆనందరూపిణ్యామ్ కనకదుర్గాయామ్
లీనం కరోమి మిథ్యాహం మమత్వం చ

శ్రీ దేవీ ప్రీతివృద్ధయే ఉపాసయామి
మహాదేవీం త్రిపురసుందరీం శారదామ్
ప్రసన్నదృష్టియుతాం శివ కామేశ్వరీమ్
సుస్థిర అనన్య భక్తి ప్రదాత్రీం భవానీం శ్రియమ్

తటిల్లతా తన్వీం దరహాసోజ్వలన్ ముఖీం
కృష్ణా నదీ తటస్థ ఇంద్రకీలాద్రి ఇంద్రాణీమ్
శివమనోవల్లరీం మల్లేశ్వర ప్రణయిణీమ్
విమలాం విజయవాటికా పురాధీశ్వరీమ్

సమస్త సన్మంగళాని భవంతు!

Top of Form

Bottom of Form