వర్గస్వామ్య నియంతృత్వం

వర్గస్వామ్య నియంతృత్వం

వృద్ధ బ్రహ్మచారి, కండల వీరుడు ఎప్పుడు ఓ ఇంటి వాడగునో

లేదో అని ఆసక్తి లేదు; అయితే, మీడియా ఊదర కొట్టుడు

ఆగునేమోనని ఆశ; పాలనను అటక ఎక్కించి,
కోతికి కొబ్బరికాయ కాయ దొరికినట్టు ఒలింపిక్ విజేత

చుట్టూ తిరిగి రాజకీయం చేస్తున్న తెలుగు రాష్ట్రాల
అధినేతలు, వారి అనుయాయులు మామూలు స్థితికి
ఎప్పుడు వస్తారో? హమ్మయ్య! ఇవాళ్టితో పుష్కరాలు
అయిపోతాయి; ఘాట్ ల చుట్టూ, సంగమముల వద్ద

వేసుకున్న తిరిగే డ్యూటీ అయిపోతుంది; మళ్ళీ
సింగపూర్ మలేసియా, జపాన్, దావోస్, రష్యా, ఢిల్లీ

భూభ్రమణములు మెదలగునేమో? అమరావతి, ఐ.టి.,

జలయజ్ఞంల హడావుడి ఎప్పుడూ ఉండేదే, 2050 వరకు; 

ఇంతలో చిన్నదొరలు అక్కడా, ఇక్కడా పార్టీ పగ్గాలు
పట్టి పాలనకొస్తారు; ప్రజలు వారికి స్వాగతం పలకడానికి

తమ సంతానాన్ని సిద్ధం చేయాలి; కార్పొరేట్ చదువులు
ఇంటింటికీ వై, ఫై లు, డిజిటల్ డేటా, కులాభివృద్ధి

కార్పొరేషన్ లు, ప్రతి వర్గానికీ రిజర్వేషన్ లు; అంతా
యధావిధిగా "పాలన" సాగుతుంది; ఇంతలో ఎన్నికలు;

సరియైన ప్రత్యర్థి లేకపోవడం వల్ల వృక్షము లేనిచోట
ఆముదపు చెట్టే మహా వృక్షము చందమున ఎన్నికవడం;

పాడిన పాటే పాడరా పాచి పళ్ళ దాసరిలా పాలనా
వ్యవహారము; చర్వితచర్వణమీ ఓటర్ల కడగండ్లు;

పాలితులు, పాలకులు సమానముగా కుల, ప్రాంతీయ భావ 

గజ్జికి, మత పిచ్చికి దోహదం చేస్తూ ప్రజాస్వామ్యం
నడుపుతారు; వివేకము, విచక్షణ, సమత్వభావనలు కల
పౌరులూ గతి లేక ఈ కలుషిత, కశ్మల ప్రవాహంలోనే 

కొట్టుకుపోతూ కొట్టమిట్టాడుతూ బతుకులీడుస్తారు
దేశంలో వర్గస్వామ్య నియంతృత్వం వేళ్ళూనుకొనును.