సూర్య చంద్రులుండు వరకు నిలిచి ఉండును

సూర్య చంద్రులుండు వరకు  నిలిచి ఉండును


కచ కుచ వర్ణనంబులొద్దని పుర్రచేతి భావజాలములతో

కవితల వెలయించి‌ తెలుగు కవన సామ్రాజ్యము నేలిన 

ఘనుల సాహిత్యమునెవరు చదువుచున్నారు నేడు? 

ప్రజాసాహిత్యమును ఏ ప్రజ పారాయణము చేయుచున్నారు?

భర్త శ్రేయస్సే తన శ్రేయస్సనుకునే భార్యలు బానిసలనీ

కుటుంబంలోని అందరిపై హృది నిండా ప్రేమ నిండిన తల్లులు

ఉండరాదని; స్త్రీ తన కోసమే తను బ్రతకాలని ఇతరులకోసం కాదని;

స్వంత కాళ్ళపై నిలబడి మగవాని వలె సంఘమున మెలగాలని

రాతలు రాస్తూ అందరి తలరాతలు అతలాకుతలం చేసే ఘనులు

అధునాతన ఆలోచనా  ధోరణితో అన్ని తారుమారు చేసిరి కుజనులు

ప్రతీదీ కొంతకాలము మాత్రమే వెలుగును; ప్రభావము ఉండును; ఇట్టి ఎన్నో
ప్రతికక్షులను ప్రతిద్వందులను చూసినది సనాతన భారతీయ సాంప్రదాయము;

పుబ్బలో పుట్టి మఖలో మాడిపోయే గంతులు ఇవి; చిరముగ మానవ నాగరికత

విలసిల్లునంతవరకు నిలిచి ఉండును భారతీయ సంస్కృతీ సంప్రదాయములు బ్రహ్మ తత్త్వము

మావపరిణామ చరిత్రలో ఎన్నో పుట్టుకలు ఎన్నో లయములు

లయబద్ధముగా జీవితముల నడుపుకొను వీలిచ్చును, లాలించును;

అమ్మవలె ఆదరించును బుజ్జగించును; సన్మార్గ  నడచుటకై చేయి అందించును

సనాతన భారతీయ సంప్రదాయము సూర్య చంద్రులుండు వరకు  నిలిచి ఉండును

నాగరికతలకే నాగరికత నేర్పును ఆత్మజ్ఞానము

విజ్ఞాన శాస్త్రముల పరిశోధనల ముందుకు తీసికెళ్ళును జ్ఞానబోధ మీమాంస;

జ్ఞానము కలుగు విధము; భాషల తీరుతెన్నులు; మనసు స్వరూప

స్వభావములు  కాచి వడబోసిన జ్ఞాన భాండాగారము భారతీయ సంస్కృతి