భారతదేశము

భారతదేశము

గోవునిక్కడ పూజించెదరు మిగతాచోట్ల అది ఒక జంతువు మాత్రమే
నదులనిక్కడ పవిత్రతీర్థములంచు స్నానములనాచరించెదరు వాటియందు
ఇంకెక్కడైనా అవి వట్టి నీటి ప్రవాహములు మాత్రమే మరింకేమీ విశేషము లేనివి;

గిరులిక్కడ దేవుళ్ళు దేవతల జన్మ స్థానములు విహార భూములు
మరెక్కడ చెట్ల సెలయేళ్ళ వహించు రాతి శ్రేణులు వట్టి ఎత్తులు

చెట్టులు పుట్టలు జంతువులును పూజార్హములిచట
మరేచోట స్థావర జంగమముల సమూహము మాత్రము

ప్రకృతి దేవత ఇచట; స్త్రీయును పవిత్ర స్వరూపము, దేవి;
బాల్యమున కౌమారమున యవ్వనమున వార్ధక్యమున; వరుసగా
తండ్రి, భర్త, కొమరులచే రక్షణ కల్పింపబడు కోమల రూపము;

మాతృదేవోభవ! పితృదేవోభవ! ఆచార్యదోవోభవ! అతిథిదేవోభవ! యని
మానవులకు గౌరవము, మర్యాద, దైవత్వము కల్పించిన సంస్కారము
వెల్లివిరిసినదిచట; సంస్కృతికి, జ్ఞానమునకు పెద్దపీట వేసిన నాగరికత ఇచటిది;

నేడు అపార్ధముల, కువిశ్లేషణల, మేధాసంపత్తీరహిత "మేధావులచే"
నిరసింపబడుతున్నది; వక్రభాష్యముల పలుచన చేయబడుచున్నది;

మనిషినే దైవము చేసిన ఉపనిషత్ సారము అద్వైతము;
ధనకనకవస్తువాహనములకన్న మానవత్వము జేజేలందుకున్నది

రామాయణభాగవతమహాభారతపంచతంత్రజాతకకథల తదితర సాహిత్యముల
అన్నిశాస్త్రముల జ్ఞానముల విజ్ఞానముల సృష్టించి పెపొందించి, పంచిన
సకలభాషాశాస్త్రకళారూపముల సర్వస్వము సంపదల సరసుల మయము
నేడు సంస్కారరహితుల స్వార్ధ, అవినీతి పరుల, దుష్టుల, దుర్మార్గుల పాలై వగచుచున్నది