దేవుడి గొడవ మీకెందుకు?

దేవుడి గొడవ మీకెందుకు?

దేవుడి గొడవ మీకెందుకు?
వదలండి దేవుణ్ణి, ఆయన భక్తులను
వారి మానాన పోనివ్వండి వారిని;
జీవించండి మీరు మీ "నమ్మకముతో" 

నమకము చమకము
మంత్రపుష్పము అనవసరము మీకు

ప్రాచ్యమో పాశ్చాత్యమో ఒక
సిద్ధాంత వ్యామోహంలో పడి
విలసిల్లండి; ఆ సిద్ధాంత విలాసినీ
మాటల మత్తులో కబుర్ల సొగసు
సోయగములలో చూడండి నాకమును
దేవుడెందుకు మీకు దేవతల ఊసెందుకు మీకు

మీది ప్రశస్త బుద్ధి; జీవించండి
ఆ బుద్ధి కుశలతతో; నమ్మకండి విధిని
దేవుని సంకల్పములను; ఆయన కారుణ్యమును
బ్రతకండి మీ స్వంత ప్రతిభతో, సామర్ధ్యములతో

వదలండి దేవుడిని, గుడిని
వెళ్ళకండి అక్కడకి, వెళ్ళండి
మీ చిత్తమొచ్చిన చోటికి

భక్తుల-భగవంతుని సహజ అనుబంధము
అవగతము కాదు మీకు;

మీరు మెచ్చు సిద్ధాంతమును,
తత్ సిద్ధాంత కర్తను కొలవండి,
పరిగణించండి అతని పుస్తకమును
పవిత్ర గ్రంథముగా; ఆ ఉక్తులను ఉటంకించండి
ఎచ్చోటనైనా; పొందండి కితాబులను

రాకండి మాజోలికి; మా సఖుని జోలికి
హేతువాదులారా, నాస్తికులారా
దేవుడు లేడని మీ "నమ్మకము" మాత్రమె
వదలండి దేవుడిని, గుడిని