అజ్ఞానపు ఘనులు, గనులు

అజ్ఞానపు ఘనులు,  గనులు

అవధానములెన్నియో అనవధానములెన్నియో నిర్లిప్తత
లెన్నియో; సంఘమున స్వోత్కర్షలు పరనిందలు పెచ్చు
పెరిగినవి అందరు ఘనులే ఇతరుల తూలనాడుటయందు
ముసలి ఆంబోతురకములెక్కువైనవి; అవి చేయలేవు

మరొకరిని చేయనీయవు; అంతయు కుల భూతద్దమున
చూచుచు భాషను, జ్ఞానమును, శాస్త్రములను భ్రష్టు
పట్టించు బాధ్యతారహితులు మేధావులుగ చలామణీ
అవుచున్నారు; ఉన్నది విద్వేషములతో కూడిన అసూయ

తాము ప్రతిభావంతులై సంఘమును ముందుకు తీసికొని
పోవు సమర్ధతలేక,‌ ఆడలేక మద్దెల ఓటన్నట్టు ఇతరులపై
పడి ఏడవడం ఒక రివాజయింది; ప్రతిభావ్యుత్పన్నతలతో
భాషకు, జ్ఞానమునకు, శాస్త్రములకు కొంగ్రొత్త రూపుల

నిచ్చు పటిమ లేక కులగజ్జి మనసంత పట్టించుకొని
సమస్తమును విధ్వంసము చేయుచున్న మూర్ఖకులజులు
ఆ గజ్జినంతా సంఘమునకు పట్టించి తాము మహా
మేధావులమనుకొను మూఢులు సంస్కృతీ సస్యమునకు

పట్టిన చీడలు; భాష మాటలాడుటకు మాత్రమే
పరిమితమైనది కాదని, అందు సమస్త సాహిత్యము
శాస్త్రములు, జ్ఞానములు సృష్టించుటకు నిర్దుష్ట భాష
అవసరమన్న అర్థము కాని పొగరుబోతులు, సంస్కార

హీనులు కులగజ్జిచే అవస్థపడు, అవస్థపెట్టు అజ్ఞానులు
జ్ఞానరహితులు; సంఘమునకు, సంస్కృతికి, వన్నెతెచ్చు
చక్కని రచనలు చేయు సంభావ్యత లేక అలమటించు
కులభవరోగ మనస్కులు, మానసికరోగులు, దౌర్భాగ్యులు